டைகீட்டோன்
டைகீட்டோன் அல்லது டையோன் (Diketone or Dione) என்பது இரண்டு கீட்டோன் வேதி வினைக்குழுக்களைக் கொண்டிருக்கும் ஒரு மூலக்கூறைக் குறிக்கும். எளிய டைகீட்டோனுக்கு டை அசிட்டைலை உதாரணமாகக் கூறுவர். 2,3-பியூட்டேன்டையோன் என்ற பெயராலும் இச்சேர்மம் அழைக்கப்படுகிறது. டைஅசிட்டைல், அசிட்டைலசிட்டோன், எக்சேன்-2,5-டையோன் என்பவை முறையே 1,2-, 1,3-, 1,4-டைகீட்டோன்களுக்கு எடுத்துக்காட்டுகளாகும். டைமெடோன் வளைய டைகீட்டோனுக்கு எடுத்துக்காட்டாகும்.
1,2-டைகீட்டோன்
[தொகு]பை அசிட்டைல் என்ற டைகீட்டோன் (CH3C(O)C(O)CH3), 1,2-டைகீட்டோன் வகைப்பாட்டில் முக்கியமான ஒரு சேர்மமாகும். டையால்களை ஐதரசன் நீக்கம் செய்வதன் மூலம் இத்தகைய சேர்மங்களைத் தயாரிக்கலாம்:[1]
- RCH(OH)CH(OH)R → RC(O)C(O)R + 2 H2.
கார்பனைல் குழுவுடன் நீண்ட C-C பிணைப்புகள் இணைந்திருப்பது 1,2-டைகீட்டோன் சேர்மத்தின் தனித்துவத் தோற்றமாகும். இப்பிணைப்பின் நீளம் 1.54 Å ஆகும். தொடர்புடைய 1,3-பியூட்டா டையீன் சேர்மத்தின் பிணைப்பு நீளம் 1.45 Å ஆகும். கார்பனைல் கார்பன் அணுக்களின் பகுதி நேர்மின் சுமைகள் இடையிலான மோதல் காரணமாக இவ்வியல்பு விளைகிறது [2]
யூரியா, தயோயூரியா போன்ற பல இருசெயல் மின்னணு மிகுபொருட்களுடன் 1,2-டைகீட்டோன் ஒடுக்கமடைந்து பல்லின வளையங்களைக் கொடுக்கிறது. இவ்வாறே அரோமாட்டிக் அமீன்களுடன் ஒடுக்கமடைந்து இவை டைகீட்டமின் ஈந்தணைவிகளாக மாற்றப்படுகின்றன.
1,3-டைகீட்டோன்
[தொகு]அசிட்டைலசிட்டோன் (CH3C(O)CH2C(O)CH3) என்ற டைகீட்டோன், 1,3-டைகீட்டோன் வகைப்பாட்டில் ஒரு முக்கியமான சேர்மமாகும். ஐசோபுரோப்பீனைலசிட்டேட்டை வெப்ப மறுசீராக்கல் வினைக்கு உட்படுத்தி இதைத் தயாரிக்க இயலும் [1]
- CH2(CH3)COC(O)Me → MeC(O)CH2C(O)Me
பாரம்பரியமாக 1,3-டைகீட்டோன்கள் கீட்டோன்களுடன் எசுத்தர்கள் சேர்த்து ஒடுக்குவதன் மூலமே தயாரிக்கப்பட்டன. ஈனோல் அல்லது ஈனோலேட்டுகள் மற்ற கார்பனைல் குழுக்களுடன் இணைந்திருப்பதால் 1,3-டைகீட்டோன்கள் இவைகளாக இருக்கும் வாய்ப்புகள் உள்ளன, மற்றும் ஆறு உறுப்பினர் சங்கிலி சேர்மமாக உருவாகும் நிலைத்தன்மையைப் பெறுகின்றன. (ஈனால் எனில் ஐதரசன் பிணைகிறது. ஈனோலேட்டு எனில் எதிரயனியைப் பெறுகிறது)
மற்ற டைகீட்டோன்களைப் போலவே 1,3-டைகீட்டோன்களும் பல்லின வளையங்கள் தயாரிப்பில் பன்முக முன்னோடிகளாக விளங்குகின்றன. உதாரணமாக ஐதரசீன் ஒடுக்கமடைந்து பைரசோல்களைத் தருகிறது. 1,3-டைகீட்டோன்களில் தயாரிக்கப்படும் இணைகாரம் உலோக அசிட்டைலசிட்டோனேட்டு அணைவுச் சேர்மங்களாக உருவாகின்றது. டிமாயோ வினையில் 1,3-டைகீட்டோன்கள் ஆல்க்கீன்களுடன் வினைபுரிந்து ஒளிவேதியியல் பெரிசைக்ளிக் மறுசீரமைப்பு மூலம் பதிலீடு செய்யப்பட்ட 1,5-டைகீட்டோன்கள் உருவாகின்றன.
1,4-டைகீட்டோன்
[தொகு]கார்பனைல் குழுக்களை இரு மெத்திலீன் குழுக்கள் பிரிக்கின்ற டைகீட்டோன்கள் குறிப்பாக அவற்றின் ஈனோல் அமைப்பு மாற்றியன்களுடன் இருப்பவை 1,4-டைகீட்டோன்கள் எனப்படுகின்றன. பால்-கினார் தொகுப்பு வினையில் இவை பயனுள்ள முன்னோடிச் சேர்மங்களாக உள்ளன. பியூரான்கள், பிரோல்கள், தயோபீன்கள் முதலானவை இத்தொகுப்பு வினையில் தயாரிக்கப்படுகின்றன.
1,4-டைகீட்டோன்கள் மற்றும் இதனுடன் தொடர்புடைய தளப்பொருட்கள் ஐதரசீன்களுடன் வினைபுரிந்து ஈரைதரோபிரிடசீன்களைத் தருகின்றன. பின்னர் இவை பிரிடசீன்களாக மாற்றப்படுகின்றன.
பிற டைகீட்டோன்கள்
[தொகு]கார்பனைல் குழுக்களை மூன்று அல்லது அதற்கு மேற்பட்ட மெத்திலீன் குழுக்கள் பிரிக்கின்ற டைகீட்டோன் வினைகள் எளிய கீட்டோன்களின் வினைகள் போல உள்ளன. மூலக்கூற்றிடை ஆல்டால் குறுக்க வினையில் இந்த நீள கீட்டோன்கள் பொதுவாக ஈடுபடுகின்றன.
ஐரோப்பிய யூனியன் வகைப்பாடு
[தொகு]2004 ஆம் ஆண்டில் ஐரோப்பிய யூனியன் அமைப்பு நறுமணமூட்டும் கூட்டுப்பொருட்களை ஒன்றிணைத்து வகைப்படுத்தியது. இக்குழுவில் டைகீட்டோன்கள் இடம்பெற்றன[3]. அசிட்டைலசிட்டோன் ஒரு மரபணுச்சிதைவுப் பொருள் என்பதால் அனுமதிக்கப்பட்ட நறுமணப் பொருட்கள் பட்டியலிலிருந்து நீக்கப்பட்டது[4]. 1999 ஆம் ஆண்டில் அனுமதிக்கப்பட்ட நறுமணப் பொருட்களின் பட்டியல் ஏற்றுக் கொள்ளப்பட்டது[5].
இவற்றையும் காண்க
[தொகு]மேற்கோள்கள்
[தொகு]- ↑ 1.0 1.1 Hardo Siegel, Manfred Eggersdorfer "Ketones" in Ullmann’s Encyclopedia of Industrial Chemistry, Wiley-VCH, 2002, Wienheim. எஆசு:10.1002/14356007.a15_077
- ↑ Eriks, K.; Hayden, T. D.; Yang, S. Hsi; Chan, I. Y. (1983). "Crystal and molecular structure of biacetyl (2,3-butanedione), (H3CCO)2, at -12 and -100 °C". J. Am. Chem. Soc 105 (12): 3940–3942. doi:10.1021/ja00350a032.
- ↑ Opinion of the Scientific Panel on Food Additives, Flavourings, Processing Aids and Materials in contact with Food[தொடர்பிழந்த இணைப்பு], EFSA Journal (2004) 166, 1-44
- ↑ COMMISSION DECISION of 18 May 2005 amending Decision 1999/217/EC as regards the register of flavouring substances used in or on foodstuffs பரணிடப்பட்டது 2012-02-06 at the வந்தவழி இயந்திரம், Official Journal of the European Union
- ↑ "Official Journal of the European Communities" (PDF). Archived from the original (PDF) on 2007-11-19. பார்க்கப்பட்ட நாள் 2017-07-30.